Konya Kadı Sicilleri (1903-1907 & 1898) Defter 150-151 sayfalar 64, 65 ve 154-162
34- Veraset Davası
[40] Hüve
Medîne-i Konya’da Vâdî-i Merâm Âşıklar Mahallesi sükkânından olup asâkir-i hazret-i
şâhânede hidmet-i askeriyyesini îfâ etmekde iken silâh altında vefât eden Seyyid’in ber-vech-i
âtî vârisi olduğunu ve el-yevm altmış dokuz yaşında olduğunu iddi‘â eden babası Mehmed bin
Mehmed m[eclis-i şer‘de] mârrü’l-beyân Vâdî-i Merâm Sokak Mahallesi’nden Ahmed Çâvuş
bin Hüseyin muvâcehesinde müteveffâ-yı merkūm Seyyid benim nikâh-ı sahîh-i şer‘î ile zevce-i
menkûha-i medhûlün-bihâm olan müteveffât Şerîfe bint-i Hâcı Mehmed’in hayâtında firâşımdan
hâsıl ve mezbûre Şerîfe’den mütevellid sulbî kebîr oğlum olmağla ol vechile oğlum müteveffâyı
merkūm Seyyid’in verâseti benimle gā’ibûn ani’l-meclis zevce-i menkûha-i metrûkesi Hafsa
bint-i Seyyid ve sulbî sagīr oğulları Mevlûd ve Hasan ve Seyyid’e münhasıra olup bizden başka
vârisi ve terekesine müstahıkk-ı âharı olmamağla binâ’enaleyh müteveffâ-yı mezbûrun mezbûr
Ahmed Çâvuş zimmetinde cihet-i karz-ı şer‘îden yetmiş iki guruş alacak hakkı olup kable’lahz
ve’l-istîfâ vefât edip meblağ-ı mezbûr benimle gā’ibûn-ı mezbûrûna mevrûs olmağla su’âl
olunup meblağ-ı mezbûr yetmiş iki guruşdan mes’ele-i mîrâsımız vechile hisse-i irsiyyeme
isâbet eden on iki guruşu bana teslîme tenbîh olunmak matlûbumdur deyu da‘vâ etdikde lede’ssu’âl
ol dahi cevâbında müteveffât-ı mezbûre cihet-i merkūmeden ol mikdâr guruş zimmetinde
sahîhan ve hâlen deyni olduğunu tâyi‘an ikrâr ve i‘tirâf edip lâkin mâ‘adâ müdde‘î-i mezbûrun
ber-minvâl-i meşrûh verâset müdde‘âsını inkâr.
Fî 23 Safer sene 1324.
Müdde‘â-aleyh-i mezbûr (mühür)
Müdde‘î-i mezbûr (mühür)
İşbu zabt-ı da‘vâ tarafeyn muvâcehesinde cehren lede’l-kırâ’e bi’l-cümle ifâde ve
iddi‘âlarına muvâfık olduğu ve zîri kendi mühür ve parmak işâretleriyle musaddak olduğunu
her biri başka başka takrîr etmeleriyle tasdîk kılındı.
Fî 24 Safer sene-i minh.
Ser-kâtib (imzâ)
Hâkimü’ş-şer‘ (imzâ)
Müdde‘î-i mezbûr Mehmed ber-vech-i iddi‘â beyyineye havâle olunduğu
Fî 24 Safer sene 1324
Hâkimü’ş-şer‘ (imzâ)
Fi’l-hakīka zâtı ma‘lûmumuz olan Vâdî-i Merâm Âşıklar Mahallesi’nden olup akdemce
silâh altında vefât eden Seyyid bin Mehmed’in verâseti zevce-i menkûha-i metrûkesi Hafsa
bint-i Seyyid ve babası işbu hâzır bi’l-meclis Mehmed bin Mehmed ve sulbî sagīr oğulları
Mevlûd ve Hasan ve Seyyid’e münhasıra ve maskat-ı re’sleri dahi Vâdî-i Merâm Âşıklar
Mahallesi olup bundan başka vârisi olduğu ma‘lûmumuz değildir biz bu husûsa bu vech üzere
şâhidiz şehâdet dahi ederiz.
Fî 23 Cumâdelûlâ sene 1324.
Câmi‘-i Kebîr Mahallesi’nden Şa‘bân’ın Süleymân Çâvuş bin Yûsuf
Vâdî-i Merâm Âşıklar Mahallesi’nden Küçük Alî’nin Hasan Çâvuş bin Ahmed
Mecelle-i Ahkâm-ı Adliyye’nin bin yedi yüz on yedinci mâddesi hükmüne tatbîkan
şâhidân-ı müstemi‘ânın mensûb olduğu mahallelerinden ümenâ-i şer‘ ma‘rifetiyle tezkiye-i
sırrîleri icrâ oluna.
Fî 23 minh.
Hâkimü’ş-şer‘ (imzâ)
**
Müdde‘î-i mezbûr Mehmed’den ber-minvâl-i meşrûh müdde‘âsına mutâbık beyyine
taleb olundukda her biri ahrâr-ı ricâl-i müslimînden olup evvelen usûl-i mevzû‘asına tatbîkan
mensûb oldukları sâlifü’l-beyân Vâdî-i Merâm Âşıklar ve Câmi‘-i Kebîr mahalleleri imâm ve
muhtârânı Mollâ Efendizâde Ahmed Efendi ve Küçük Alî’nin Hasan Çâvuş ve Uzun Alî’nin
Hâcı Mustafâ ve Midhat Efendi ibn-i Alî ve Alî bin Abdullâh ve Abdullâh bin Mehmed’den
bâ-varaka-i mestûre sırran ve ba‘dehû tarafeyn muvâcehesinde Ankaralı Alî bin Mehmed ve
Lâtif’in Mustafâ bin Nasûh’dan alenen lede’t-tezkiye adl ve makbûlü’ş-şehâde idükleri iş‘âr
ve ihbâr olunan Küçük Alî’nin Hasan Çâvuş bin Ahmed ve Şa‘bân’ın Süleymân bin Yûsuf’un
ber-tıbk-ı müdde‘â tafsîl-i mezkûr üzere müttefiku’l-lafz ve’l-ma‘nâ bi’l-muvâcehe ber-nehc-i
şer‘î eyledikleri şehâdet-i şer‘iyyeleriyle isbât etmeğin mûcibince verâsetlerine ba‘de’l-hükm
meblağ-ı müdde‘â-bih-i mezkûr yetmiş iki guruşu mes’ele-i mîrâsları vechile bi-kadrı’l-hısas
beynlerinde taksîm etmek üzere teslîme müdde‘â-aleyh-i merkūm Ahmed Çâvuş’a kıbel-i
şer‘den tenbîh olunduğu.
Fî 10 Cumâdelâhire sene 1324.
Hâkimü’ş-şer‘ (imzâ)
**
[103] Hüve
Medîne-i Konya’da Vâdî-i Merâm Aşağı Mahallesi’nde sâkin iken bin üç yüz yirmi iki
sene-i mâliyyesi şehr-i Haziran’ın on beşinci günü vefât eden Himmetoğlu Hâcı Mustafâ bin
Himmet bin ( ) verâseti zevce-i menkûha-i metrûkesi Şerîfe bint-i ( ) ve sulbî kebîr oğlu Dede
Mustafâ ve sulbiyye kebîre kızı Hadîce’ye münhasıra olduğu bi’l-ihbâr ve mes’ele-i mîrâsları
bi-hükmi’l-ferâ’iz yirmi dört sehimden olup sihâm-ı mezbûreden üç sehim zevce-i mezbûreye ve on dört sehmi ibn-i mezbûr Dede Mustafâ’ya ve yedi sehmi dahi bint-i mezbûre Hadîce’ye
isâbeti ba‘de’t-tahakkukı’ş-şer‘î vereseden olup zâtı Dereli Mollâ Mehmed Efendi ve Köse
Bekir’in Hasan ta‘rîfleriyle mu‘arrefe bint-i kebîre-i mezbûre Hadîce Hatun tarafından husûs-ı
âtîyyü’l-beyânda taleb ü da‘vâ ve ahz u kabza ve ikāme-i şuhûd ve taleb-i tahlîfe vekâlet-i
mutlaka-i sahîha-i şer‘iyye ile vekîl-i müseccel-i şer‘îsi medîne-i mezbûre mahallâtından
Çiftenerdübân Mahallesi mütemekkinlerinden Devlet-i Aliyye-i Osmâniyye teba‘asının Ermeni
milletinden Ohannes Efendi veled-i Hamparsom meclis-i şer‘-i münîrde zikr-i câ’î menzil-i
debbâğ ve bâğçe ve değirmen ve tarlaya vaz‘-ı yedi beyyine-i âdile ile şer‘an sâbit olan ibn-i
kebîr-i mezbûr Dede Mustafâ tarafından kezâlik husûs-ı âtiyyü’l-beyânda taleb ü da‘vâ ve
terâfu‘ vü husûmet ve redd-i cevâba ve ikāme-i şuhûd ve taleb ü tahlîfe vekâlet-i mutlaka-i
sahîha-i şer‘iyye ile vekîl-i müseccel-i şer‘îsi Civâr Mahallesi’nden Na‘lbendzâde Hüseyin
Efendi ibn-i Mehmed muvâcehesinde sâlifü’z-zikr Dere’nin Aşağı Mahallesi’nde kâ’in bir
tarafdan çay ve bir tarafdan Kör Alî veresesi ve bir tarafdan Deli Katırcı veresesi menzilleri ve
taraf-ı râbi‘i tarîk-i âmm ile mahdûd ma‘a müştemilât beş bin guruş kıymetli bir bâb mülk
menzil ve yine mezkûr Dere’de bir tarafdan Çebiçoğlu Osmân ve bir tarafdan mescid-i şerîf ve
ba‘zen tarîk ve Kamacı’nın Osmân mülkleri ile mahdûd Midilli Değirmeni demekle ma‘rûf bir
bâb âsiyâbda olan iki kıyye i‘tibârıyla altı bin guruş kıymetli bir buçuk kıyye elli dirhem
değirmen hissesi ve yine mezkûr Dere’de vâki‘ bir tarafdan çay ve etrâf-ı selasesi cebel ile
mahdûd Kaya Değirmeni demekle ma‘rûf âsiyâbda altı kıyye i‘tibârıyla bin guruş kıymetli yüz
dirhem değirmen hissesi ve yine Dere’de Deliklitaş nâm mahalde kâ’in bir tarafdan Kula’nın
İsmâ‘îl ve bir tarafdan Kara Hasanoğlu hafîdi Ahmed ve bir tarafdan Çopur Hasan’ın Mustafâ
ve bir tarafdan müteveffâ-yı mezbûrun kendi tarlası ile mahdûd iki bin guruş kıymetli eşcârlı
öşre tâbi‘ olmayan arâzî-i memlûke arâzî-i emîriyyeden bir dönüm tarla ve yine mevki‘-i
mezkûrda bir tarafdan Bacakoğlu Seyyid ve bir tarafdan Hâfız İbrâhîm veresesi ve bir tarafdan
müteveffâ-yı mezbûrun kendi tarlası ve taraf-ı râbi‘i Halîl’in Bekir tarlası ile mahdûd dört bin
guruş kıymetli kezâlik eşcârlı öşre tâbi‘ olmayan arâzî-i memlûke arâzî-i emîriyyeden iki
dönüm tarla ve yine mezkûr Dere’de vâki‘ bir tarafdan çay ve bir tarafdan Kılbacağ’ın Mehmed
ve bir tarafdan Halîl’in Bekir ve bir tarafdan Çebiçoğlu bâğçesiyle mahdûd iki bin guruş
kıymetli bir dönüm mikdârı kürûmu mülk bâğ ve yine Konya’da Hoca Cihân Mahallesi’nde
kâ’in bir tarafdan Halîl ve bir tarafdan Derbendli ( ) veresesi ve bir tarafdan Hâcı İbiş ve bir
tarafdan Kamacı’nın Osmân bâğı ile mahdûd bin beş yüz guruş kıymetli bir dönüm kürûmu
mülk bâğ ve mecmû‘u on iki bin seksen beş guruş kıymetli otuz beş re’s sağmal koyun ve on
beş re’s sağmal tiftik keçi ve yirmi re’s kuzu ve üç aded makat ve on sekiz aded cedîd keçe ve
yirmi aded müsta‘mel keçe ve on aded palas ve dört aded Türkmen kürkü ve bir aded maşlak
kürk ve dört aded yün memlû yatak minderi ve altı aded yorgan ve altı aded minder ve yirmi aded duvar yasdığı ve bir kebîr dakīk anbâr [104] ve bir nühâs leğen ma‘a ibrik ve bir nühâs
kebîr âbdest leğeni ve dört nühâs tava ve bir nühâs kebîr pekmez leğeni ve üç nühâs sagīr
çamaşır leğeni ve bir nühâs dîvân sînî ve iki orta sînî ve bir aded nühâs mangal ve yirmi nühâs
sahan ve üç nühâs tepsi ve sekiz nühâs tencere ve beş nühâs tâs ve bir nühâs helke ve bir tepsi
tavası ve bir nühâs kebîr kazgan ve iki nühâs haranı ve altı çuval ve dört heybe ve bir nühâs
zemzemiyye ve bir eğer takımı ve bir re’s esb ve bir re’s merkeb müvekkilem mezbûre Hadîce
Hatun’ın mûrisi babası müteveffâ-yı mezbûr Hâcı Mustafâ’nın hayâtında ile’l-vefât yedinde
mâl ve mülkü olup ba‘de vefâtihî emlâk ve menkūlât ve hayvânât-ı muharrere-i mezkûre
müvekkilem bint-i mezbûre karındaşı müvekkil-i mezbûr Dede Mustafâ’ya vâlideleri zevce-i
mezbûre Şerîfe Hatun’a mes’ele-i mîrâsları vechile ve mezkûr tarlalar dahi ber-mûceb-i kānûn-ı
cedîd-i sultânî ancak müvekkilem mezbûre ile er karındaşı müvekkil-i mezbûr Mustafâ’ya
mevrûs ve müntakil olup beynlerinde iktisâmı iktizâ eder iken zikr olunan emlâk ve arâzî ve
menkūlât ve hayvânât-ı muharrere-i mezkûreleri müvekkil ibn-i mezbûr Dede Mustafâ fuzûlî
ve bi-gayrı hakkın zabt ve müvekkilem mezbûreyi intifâ‘dan men‘ eder olmağla su’âl olunup
ber-mûceb-i mes’ele-i mezkûre ve ber-mûceb-i kānûn-ı cedîd-i sultânî hisse-i irsiyye ve
müntakilesini teslîme ve akārât ve arâzî-i mezkûreleri ma‘rifet-i şer‘le ve arâzî me’mûru hâzır
bulunduğu hâlde taksîm ve hisse-i musîbe ve müntakilesini müvekkilem mezbûre içün bana
mahallinde vech-i lâyıkıyla teslîme kıbel-i şer‘den tenbîh olunmak matlûbumdur deyu bi’lizâfe
ve bi’l-vekâle da‘vâ etdikde lede’s-su’âl vekîl-i mezbûr Hüseyin Efendi dahi cevâbında
müvekkilim mezbûr Dede Mustafâ’nın pederi müteveffâ-yı mezbûr Hâcı Mustafâ hayâtında
vefâtından mukaddem ya‘nî bin üç yüz yirmi sene-i mâliyyesi şehr-i Şubatı’nın evâsıtında
mahzar-ı şuhûdda mezkûr Dere’de vâki‘ etrâf-ı selâsesi cebel ve taraf-ı râbi‘i çay ile mahdûd
Kaya Değirmeni demekle arîf bir bâb âsiyâbda olan yüz dirhem hissesiyle yine mezkûr Dere
Mahallesi’nde kâ’in hudûd-ı mezkûre ile mahdûd olan menzilin derûnunda vâki‘ bir bâb ahır
odasından mâ‘adâ bâlâda zikr olunan akārât ve arâzî ve eşyâ-i menkūle ve hayvânât-ı muharrere-i
mezkûrenin mecmû‘u kendisinin olmayıp ancak oğlu müvekkilim mezbûr Dede Mustafâ’nın
olduğunu ifâde ve takrîr ederek nefy-i mülk etmiş olduğu ve hattâ mecâlis-i müte‘addidde
mahzar-ı şuhûdda ber-minvâl-i meşrûh mezkûr değirmen hissesiyle bir göz odasından mâ‘adâ
kendisine nisbet olunan kâffe-i akār ve menkūlât ve hayvânât-ı muharrere-i mezkûre kendisinin
olmayıp oğlu müvekkilim mezbûr Dede Mustafâ’nın olduğunu dahi ikrâr etmekle vekîl-i
mezbûr Ohannes Efendi’nin ber-vech-i muharrer tasaddî eylediği iddi‘âsının reddini taleb
ederim deyu bi’l-izâfe ve bi’l-vekâle def‘ ile tasaddî edicek vekîl-i mezbûr Ohannes Efendi
dahi cevâbında bâlâ-yı zabtımda taksîmini bi’l-vekâle ve bi’l-izâfe taleb etmiş olduğum sâlifü’lbeyân
akār ve menkūlât ve hayvânât-ı muharrere-i mezkûrelerin müteveffâ-yı mezbûrun
vefâtından ya‘nî fî 15 Haziran sene 1322 târîhinde vefât edip işbu târîhden bir hafta sonra müvekkil-i mezbûr Dede Mustafâ babası müteveffâ-yı mezbûr Hâcı Mustafâ’nın mâl ve mülkü
olduğunu mahzar-ı şuhûdda ya‘nî Hatîb Hoca Bey odaları önünde Çivil’in Ahmed Çâvuş ve
Kerîm’in Seyyid’in Kara Mehmed ve Hâcı Hatîb’in Mustafâ Efendi hâzırlar olup başka kimesne
olmadığı hâlde ve müteveffâ-yı mezbûrun târîh-i vefâtından yirmi gün sonra dahi Ca‘fer’in
Alî’nin hânesinde Ca‘fer ve Muhtâr Hamza ve Karcı Alî ve Kılbacağ’ın Osmân hâzırlar olup
başka kimesne olmadığı hâlde ikrâr ile beyne’l-verese da‘vâdan sonra Hâcı Velî’nin Süleymân’ın
dükkânı önünde Hâcı Velî’nin Süleymân ve Bakkāl Mustafâ ve Alî Çâvuş’un Na‘îm nâm
kimesneler hâzırlar olup başka kimesne olmadığı hâlde müvekkileme haber göndermiş ol
vechile taksîmine tâlib ve mübâşeret etmiş olmağla binâ’enaleyh terekenin taksîmine mübâşeret
ise maksûmun müşterek olduğunu ikrâr demek olduğundan iddi‘âsının reddini taleb ederim
deyu def‘ ale’l-def‘a kıyâm edicek müdde‘î-i dâfi‘-i vekîl-i mezbûr Hüseyin Efendi dahi
cevâbında müvekkilim mezbûr Dede Mustafâ ancak zikr olunan Kaya [105] Değirmeni’nde
bulunan yüz dirhem hisse ve mezkûr bir göz ahır odası hakkında taksîme tâlib olup mâ‘adâsı
hakkında ikrâr ve taksîme mübâderet gibi bir hâl vâki‘ olmamışdır deyu ehadühümâ âherin berminvâl-
i meşrûh nefy-i mülk ve ikrâr-ı meşrûh ve taksîme mübâderet müdde‘âlarını külliyyen
inkâr etmeleriyle ale’l-usûl zeyl-i zabt tarafeyn da‘vâ vekîllerine imzâ ve temhîr etdirildi.
Fî 28 Receb sene 1324.
Müdde‘â-aleyh vekîli mezbûr Hüseyin Efendi (imzâ)
Müdde‘î vekîli merkūm Ohannes (imzâ)
İşbu zabt-ı da‘vâ tarafeyn muvâcehesinde cehren lede’l-kırâ’e bi’l-cümle ifâde ve
iddi‘âlarına muvâfık olduğu ve zîri kendi imzâ ve mühürleriyle musaddak bulunduğunu her
biri başka başka takrîr etmeleriyle tasdîk kılındı.
Fî 4 Şa‘bân sene 1324.
Ser-kâtib (imzâ)
Hâkimü’ş-şer‘ (imzâ)
Ba‘dehû mes’ele-i meşrû‘a-i husûsiyyesine tatbîkan îcâbât-ı şer‘iyyesi kıbel-i şer‘den
tarafeyn vekîllerine tefhîm kılınmak üzere evvel emirde münâza‘un-fîh olan akār ve arâzînin bi’lbeyyineti’ş-
şer‘iyye müvekkil-i mezbûr Dede Mustafâ’nın vâzı‘u’l-yed olduğunu müdde‘iyye
vekîli merkūm Ohannes Efendi’nin bi’l-izâfe ve bi’l-vekâle isbât etmesi iktizâ eylediği.
Fî 4 Şa‘bân sene [1]324.
Hâkimü’ş-şer‘ (imzâ)
Fi’l-hakīka Dere’nin Aşağı Mahallesi’nde kâ’in bir tarafdan tarîk ve çay ve Kör Alî veresesi ve Deli Katırcı veresesiyle mahdûd bir bâb mülk menzil ve yine Dere’de Nehir
Caddesi’nde vâki‘ bir tarafdan çay ve Çebiçoğlu Osmân ve bir tarafdan mescid-i şerîf ve tarîk
ve Kamacı’nın Osmân ile mahdûd Midilli Değirmeni demekle ma‘rûf değirmendeki hissesi ve
yine mezkûr Dere’de vâki‘ bir tarafdan çay ve etrâf-ı selâsesi cebel ile mahdûd Kaya Değirmeni
demekle ma‘rûf değirmen hissesi ve Deliklitaş nâm mahalde vâki‘ bir tarafdan Kula’nın İsmâ‘îl
ve Kara Hasanoğlu hafîdi Ahmed ve Çopur Hasan’ın Mustafâ ve kendi tarlası ile mahdûd bir
dönüm tarla ve yine mevki‘-i mezkûrda vâki‘ bir tarafdan Kılbacakoğlu Seyyid ve Hâfız İbrâhîm
veresesi ve kendi tarlası ve taraf-ı râbi‘i Halîl’in Bekir ile mahdûd iki dönüm tarla ve yine
mezkûr Dere’de kâ’in bir tarafdan çay ve Kılbacağ’ın Mehmed ve bir tarafı Halîl ve Çebiçoğlu
Osmân ile mahdûd bir dönüm kürûmu mülk bâğ ve Hoca Cihân nâm mahalde kâ’in bir tarafdan
Halîl ve bir tarafdan Derbendli veresesi Hüseyin ve Hâcı İbiş ve Kamacı’nın Osmân ile mahdûd
kürûmu mülk bir dönüm bâğa el-hâletü hâzihî Hâcı Mustafâ oğlu zâtı ma‘lûmumuz olan Dede
Mustafâ’nın vâzı‘u’l-yed olduğuna şâhidiz şehâdet dahi ederiz.
Fî 8 Şa‘bân sene 1324.
Câmi‘-i Kebîr Mahallesi’nden Mustafâ bin Hüseyin (parmak işâreti)
Vâdî-i Merâm Aşağı Mahallesi’nden Hüseyin bin Çâvuş’un Hasan (parmak işâreti).
Şâhidân-ı mezbûrân evvelen mensûb oldukları mahallelerinden bâ-varaka-i mestûre
sırran ve ba‘dehû tarafeyn muvâcehesinde alenen lede’t-tezkiye adl ve makbûlü’ş-şehâde
idükleri iş‘âr ve ihbâr olunmağın mûcibince müvekkil-i mezbûr Dede Mustafâ’nın zikr olunan
akārâta vaz‘-ı yedine hükm olunduğu.
Fî 4 Zilka‘de sene 1324.
Hâkimü’ş-şer‘ (mühür)
[106] Vekîl-i mezbûr Ohannes Efendi ber-vech-i muharrer ikrâr ve taksîme ibtidâr
müdde‘âsıyla bi’l-vekâle beyâna havâle olunduğu.
Fî 4 Zilka‘de sene 1324.
Hâkimü’ş-şer‘ (mühür)
Bâlâda isimlerini beyân eylediğim yedi nefer şâhidden başka şâhidim yokdur.
Fî 4 Zilka‘de sene 1324.
Vekîl-i mezbûr Ohannes Efendi (imzâ)
Mâh-ı hâl-i Arabî’nin sekizinci Pazar-ertesi günü [şâhidlerimi] ikāme eyleceğimden
istimhâl ederim demekle ale’l-usûl tarafeyne imzâ etdirildi.Fî 4 Zilka‘de sene 1324.
Vekîl-i mûmâ-ileyh Hüseyin Efendi (imzâ)
Vekîl-i mezbûr Ohannes Efendi (imzâ)
Mâh-ı hâl-i Arabî’nin on üçüncü Cum‘a-ertesi günü şâhidlerimi ikāme etmek üzere
istimhâl ediyo[ru]m mezkûrlar [ile] hâzır bulunacağımızı imzâ ederiz.
Fî 8 Zilka‘de sene 1324.
Vekîl-i mezbûr Hüseyin Efendi (imzâ)
Vekîl-i mezbûr Ohannes (imzâ)
Fi’l-hakīka işbu târîh-i zabtdan iki buçuk mâh mukaddem sâ‘at on bir râddelerinde
Konya’da Vâdî-i Merâm Sokak Mahallesi’nden Abdullâh Efendi işbu hâzır bi’l-meclis
Dede Mustafâ’ya hitâben Kamacı’nın Osmân beni vekîl etdi zevcesi Hadîce’nin pederi Hâcı
Mustafâ’dan mevrûs hisse-i irsiyyesini senden istiyor buna mukābil yüz dirhem değirmen
hissesi ver demesiyle merkūm Dede Mustafâ dahi senin hâtırın içün elli dirhem değirmen
hissesi vereyim ve başka mâllarından dahi şer‘an nizâmen hakkı var ise hissesini aynen alsın
dedi ben bu husûsa bu vech üzere şâhidim şehâdet dahi ederim.
Fî 13 Zilka‘de sene 1324.
Vâdî-i Merâm Sokak Mahallesi’nden Kerîm’in Seyyid’in Kara Mehmed bin Seyyid
(mühür)
Fi’l-hakīka işbu târîh-i zabtdan beş mâh mukaddem Vâdî-i Merâm Aşağı Mahallesi’nde
kâ’in hânemde işbu hâzır bi’l-meclis Dede Mustafâ’ya hitâben pederin Hâcı Mustafâ’dan
mevrûs değirmen ve bâğ ve tarla ve sâ’ir terekeden hissesini ver deyu ricâ etdiğimizde ol dahi
yarın Hamza’nın odasın[d]a birleşelim de bir şey yapalım dedi ben bu husûsa bu vech üzere
şâhidim şehâdet dahi ederim.
Fî 13 minh.
Vâdî-i Merâm Aşağı Mahallesi’nden Ca‘fer Alî bin Ca‘fer (parmak işâreti)
Parmak işâreti mezbûr Ca‘fer Alî’nin olduğunu tasdîk ederim.
(imzâ)
Fi’l-hakīka işbu târîh-i zabtdan dört mâh mukaddem Vâdî-i Merâm Sokakbaşı’nda
Dereli Abdullâh Efendi işbu hâzır bi’l-meclis Dede Mustafâ’ya hitâben seni hemşîren Hadîce
ile babanızdan mevrûs hissesinden dolayı seni sulh edeyim demesi üzerine merkūm Dede Mustafâ dahi hâtırınız içün elli dirhem değirmenden hisse vereyim dedi ben bu husûsa bu vech
üzere şâhidim şehâdet dahi ederim.
Fî 13 minh.
Çivil’in Ahmed Çâvuş bin Hüseyin (mühür)
Diğer dört nefer şâhidlerimi mâh-ı hâl-i Arabî’nin on yedinci Çehâr-şenbih günü ikāme
etmek üzere istimhâl ve yevm-i mezkûrda hâzır bulunacağımızı imzâ ederiz.
Fî 13 Zilka‘de sene 1324.
Vekîl-i mûmâ-ileyh Ohannes Efendi (imzâ)
Vekîl-i mûmâ-ileyh Hüseyin Efendi (imzâ)
Ma‘zeret-i şehâdet
İşbu târîh-i zabtdan iki mâh mukaddem ben Dere karyesine varmışdım işbu hâzır bi’lmeclis
Dede Mustafâ’ya hitâben yek-diğerine fâriğa etmeğin beyninizde bir şey yapayım dedim
ve merkūm Dede Mustafâ sükût etdi.
Fî 21 Zilka‘de sene 1324.
Bâb-ı Aksarây Mahallesi’nden Kabirci’nin Alî bin Hâcı İbrâhîm (mühür)
[107] İşbu târîh-i zabtdan altı mâh mukaddem Merâm’da Kurt Kahvesi’nde oturmakda
idim işbu hâzır bi’l-meclis dayızâdem Dede Mustafâ yanıma gelerek hemşîresi Hadîce’nin
mîrâs taleb etmesinden dolayı zevci Osmân’a söyle de yaylacılar geldiğinde bir şey yapayım o
da atanın evlâdı dedi ben bu husûsa bu vech üzere şâhidim şehâdet dahi ederim.
Fî 21 Zilka‘de sene 1324.
Dere’nin Aşağı Mahallesi’nden Alî Çâvuş’un Na‘îm (mühür)
Diğer şâhidlerimi ikāme ve ihzârdan âciz olduğum cihetle tahlîfe bi’l-vekâle tâlibim.
Fî 21 Zilka‘de sene-i minh.
Vekîl-i merkūm Ohannes Efendi (imzâ)
Dâfi‘-i vekîl-i mûmâ-ileyh Hüseyin Efendi def‘-i mezkûrunu nefy-i mülk müdde‘âsıyla
beyâna havâle olunduğu.
Fî 21 Zilka‘de sene 1324.
Hâkimü’ş-şer‘
Müvekkil-i mezbûr Dede Mustafâ’dan müdde‘âsına mutâbık beyyine taleb olundukda
Vâdî-i Merâm Aşağı Mahallesi’nden Dede’nin Ahmed’in Himmet Vâdî-i Merâm Aşağı Mahallesi’nden Dede’nin Ahmed’in Hüseyin
Vâdî-i Merâm Aşağı Mahallesi’nden Kılbacağ’ın Osmân oğlu Osmân, geldi
Vâdî-i Merâm Aşağı Mahallesi’nden Kılbacağ’ın Osmân oğlu Mustafâ
Vâdî-i Merâm Aşağı Mahallesi’nden Kılbacağ’ın Seyyid’in oğlu Mehmed
Vâdî-i Merâm Aşağı Mahallesi’nden Çâvuşoğlu Mehmed bin İsmâ‘îl, geldi
Vâdî-i Merâm Aşağı Mahallesi’nden Çâvuş’un Mehmed oğlu Seyyid bin Mehmed
Vâdî-i Merâm Aşağı Mahallesi’nden Topal’ın Süleymân bin Ahmed
Vâdî-i Merâm Aşağı Mahallesi’nden Kel İsmâ‘îl’in Mehmed bin Abdullâh
Vâdî-i Merâm Aşağı Mahallesi’nden Silleli’nin Abdullâh bin İsmâ‘îl
Vâdî-i Merâm Sokak Mahallesi’nden Hâcı Hatîb’in Hâcı Mustafâ Efendi
Vâdî-i Merâm Câmi‘-i Kebîr Mahallesi’nden Kel Alî’nin Mehmed oğlu Mustafâ
Vâdî-i Merâm Sokak Mahallesi’nden Çivil’in Mehmed bin Hüseyin
İşbu on üç nefer şâhidlerden başka şâhidim olmadığı gibi mâh-ı hâl-i Arabî’nin yirmi
sekizinci Cum‘a-ertesi günü ikāme ve ihzâr edeceğim.
Fî 21 Zilka‘de sene 1324
Vekîl-i mûmâ-ileyh (imzâ)
Son mehil olarak mâh-ı hâl-i Arabî’nin yirmi üçüncü Çehâr-şenbih günü diğer şâhidlerimi
ikāme etmek üzere istimhâl ederim demekle zeyl-i zabt kendilerine imzâ etdirildi.
Fî 16 Zilhicce sene 1324.
Vekîl-i mezbûr Ohannes Efendi (imzâ)
Vekîl-i mûmâ-ileyh Hüseyin Efendi (imzâ)
Gelecek mâh-ı Muharremü’l- harâm’ın üçüncü Cum‘a-ertesi günü diğer şâhitlerimi
ikāme etmek üzere son ve nihâyet olmak üzere istimhâl ederim demekle kendisine imzâ ettirildi.
Fî 23 Zilhicce sene 1324
Vekîl-i mezbûr Hüseyin Efendi (imzâ)
İşbu târîh-i zabtdan iki sene mukaddem benim Dere karyesinde kâ’in Aşağı Mahallesi’nde
vâki‘ kendi hânemde eniştem müteveffâ Hâcı Mustafâ hayâtında vefâtından iki sene mukaddem
benim mâlda bir medhalim yok mâl oğlumun, Kaya Değirmeni’nde yüz dirhem hissemle bir
göz damım var dedi ben bu husûsa bu vech üzere şâhidim şehâdet dahi ederim.
Fî 26 Zilka‘de sene 1324.
Vâdî-i Merâm Aşağı Mahallesi’nden Kılbacağ’ın Osmân bin Osmân (parmak işâreti) Dere karyeli müteveffâ Hâcı Mustafâ hayâtında vefâtından mukaddem ya‘nî iki seneye
karîb bir zamânda kendi hânesinde benim yüz dirhem değirmen hissemle bir göz damdan
mâ‘adâ mâlım oğlumundur dedi ben bu husûsa bu vech üzere şâhidim şehâdet dahi ederim.
Fî 26 minh.
Vâdî-i Merâm Aşağı Mahallesi’nden Çâvuşoğlu Mehmed bin İsmâ‘îl (parmak işâreti)
Şâhidân-ı mezbûrânın sûret-i şehâdetleri da‘vâya muvâfık olup olmadığı beyân
buyurulmak üzere fekāhetlü Müsevvid Efendiye.
Fî 27 minh.
Hâkimü’ş-şer‘ (mühür)
Çâvuşoğlu Mehmed’in şehâdeti da‘vâya muvâfık olmadığı.
Mehmed
Mâ-ba‘dı yüzüncü sahîfeye nakl şüd.